خايف
خايف اقابلة
انا كنت بعيد خااااالص
وبدات احاول اقربلة
بس خايف
خايف ابعد تانى
اسوأ شعور بالخوف الانسان بيحس بية لما كان صغير شوية
وهو برا البيت وماشي مع مامتة وتكون شايلة حاجات كتير في ايديها ومفيش ايد فاضية تمسك ايدة ويدوبك ماسك في هدومها وهو خايف ايدة تفلت وتيجي واحدة كدا طول بعرض بارتفاع
تروح خابطاة ايدة تفلت وفي وسط الزحمه عيونة تغيب عن مامتة ومايبقاش شايفها
بتمر علية ثوانى كانها سنين
احساس بالخوف بيمر في جسمه كله رعشة بتخلي عينية تدمع من مجرد التفكير انة كدا مش هيشوفها تانى ولا انها هتقدر تجيلة تانى وتمسك ايدة
مليون فكرة بتلف في عقلة الصغير مابيقدرش يقاومها وبيبتدى يفقد الامل انة
ممكن يشوف مامتة تانى
وبيفضل يلف بعيونة في كل مكان ويجري كمان دا لو كان رجلية قادرة تشيلة ويجري من كتر الرعب انة كدا خلاص
فكرة واحدة بتسيطر عليه انة كدا
تاه
الشعور بالخوف دا ماليني ومسيطر عليا بس مش انى اتوه من مامتى وماشوفهاش تانى
بس انى اتوه عن الدنيا واروح ماقدرش ارجع تانى
انا حاولت ارجع تانى
ارجع للى احسن من مامتى
ارجع لربنا
بعد ماكنت بعدت اوى عنه
وبدات ارجع بس مفيش حاجة بتيجي بالساهل
الف حاجة وحاجة بتضعف اى انسان بتبدى تبان ادامة وتغرية انة يفضل كدا زى ماهو
يمكن يكون دا اختبار
بس كل انسان وعنده قدرة احتمال مش معقول هقدر اقاوم كل دا
خايف افشل في انى ارجع تانى للطريق للصح واضعف وافشل انى ارجع وتتقلب عليا وارجع اكتر من الاول
بس لما فكرت في كدا افتكرت ان الطفل اللى شعر بالخوف وانة تاه مش هيا دي نهاية حكايتة
لا
بعدها بشوية بيركز ويحاول يشوف في وسط دموعه اللى ملت عينية ويلاقي قلبة اللى كان بيدق وحس انة هيطلع برا جسمه من كتر الدق يلاقية رجع تانى وهدى والدنيا اللى بقت مزغللة من كتر دموعه تبدى تبان احسن ويلاقي مامته واقفة ادامة هيا كمان قالبها رجع مكانة
من كتر الخوف على ابنها وتجرى علية وتضمه ويحسو ان الدنيا ابتدت تضحك تانى وتمسك في ايدة كويس هيا هتبصلة جامد وتخلية يبكي اكتر بس دا من خوفها علية وانة مايعملش كدا تانى بس بسرعه هترجع تضحكلة تانى وتقولة
ماتعيطش بقا اديني رجعتلك تانى وبضحكلك اهو
لما افتكرت النهاية دى قلت مايمكن الدنيا ترجعلى تانى وتبقي احلى وتبصلي جامد وتقولى
ماتعيطش بقا اديني رجعتلك تانى وبضحكلك اهو
ياترى انا اللى المفروض اجرى علي الدنيا وانسي الاخرة ولا استني لما الدنيا تجيني لوحدها وتضحكلى ؟
بس انا مستني من زمان ولسا مضحكتش
ومن كتر ماستنيتها بعدت عنها وعن ربنا
انا مابقتش عارف افكر ولا اقرر
وكل اللى مسيطر عليا الخوف والتردد
.jpg)